អាមេរិក៖ គ្រោះទឹកជំនន់មួយបានកើតឡើងនៅរដ្ឋ Tennessee​​ ភាគខាងត្បូងសហរដ្ឋអាមេរិក ដែលបានបណ្តាលឱ្យមនុស្សយ៉ាងហោចណាស់ ២១នាក់បានស្លាប់ និងរាប់សិបនាក់ផ្សេងទៀតបានបាត់ខ្លួនក្នុងហេតុការណ៍នេះ។ នេះបើយោងតាមរបាយការណ៍ពីមន្រ្តីក្នុងតំបន់ ដែលជាការជូនដំណឹងបឋមពាក់ព័ន្ធនឹងហេតុការណ៍នេះនៅថ្ងៃទី២២ ខែសីហា ម្សិលមិញនេះ។

រដ្ឋ Tennessee  បានរងគ្រោះដោយខ្យល់ព្យុះ និងជំនន់ទឹកភ្លៀងដ៏អាក្រក់មួយក្នុងប្រវត្តិសាស្ត្រ ដែលផ្អែកតាមការឱ្យដឹងពីមន្រ្តីឧតុនិយមបានឱ្យដឹងថា ជំនន់ទឹកភ្លៀងនឹងនៅតែបន្តកើតមាន ដែលបច្ចុប្បន្ននេះទឹកមានកម្ពស់ប្រមាណជិត ៤០សង់ទីម៉ែត្របានវាយប្រហារតំបន់សំខាន់ៗមួយចំនួននៃរដ្ឋនេះ។

ផ្លូវលំ ផ្លូវល្បឿនលឿន (High Way) និងស្ពានសំខាន់ៗត្រូវបានខូចខាត និងកាត់ផ្តាច់ដោយទឹក ព្រមទាំងមានការដាច់ចរន្តអគ្គិសនីនាំឱ្យមានការប៉ះពាល់ដល់ពលរដ្ឋរាប់ពាន់គ្រួសារ។ អាជ្ញាធរបានបញ្ជាក់ថា មនុស្សចំនួន ២០នាក់បានស្លាប់បាតបង់ជីវិតដោយហេតុការណ៍៍នេះ នៅក្នុងទីក្រុង Waverly តំបន់ Humphreys។

មន្រ្តីប៉ូលិសក្នុងតំបន់បានឱ្យដឹងថា ដំបូងឡើយមានមនុស្សជាង ៤០នាក់ត្រូវបានរាយការណ៍ថាបាត់ខ្លួន ប៉ុន្តែពេលនេះចំនួនអ្នកបាត់ខ្លួននៅសល់តែជាង ២០នាក់ប៉ុណ្ណោះ ខណៈក្រុមសង្គ្រោះបន្ទាន់ និងក្រុមរុករកមនុស្ស នៅតែប​ន្តការងាររបស់ខ្លួនយ៉ាងសកម្ម ដើម្បីបន្តស្វែងរកអ្នកបាត់ខ្លួនដែលនៅសេសសល់ផ្សេងទៀត៕